الحنين للوطن والفرح بالعودة
الحنين للوطن والفرح بالعودة | واحد رسل رسالة لصديقه ، بتخيل انه بكرة نودع شندي وعطبرة وكسلا ودنقلا وسنار والاپيض ونتجه نحو الخرطوم تغمرنا الفرحة ومطار الخرطوم طيارة هابطة كل نصف ساعة والبوري والفرحة والزغاريد بالعودة
رد ليه وقال :
خيالك بكرة بتحقق
وتنجلي للمحن صفحات
ونسجد للكريم شاكرين
ونطوي عتمة الظلمات
ونصبح للبيوت راجعين
وتبقي الفرحه ياها الجات
نودع عطبرة وشندي
تكون السيرة بالبصات
ونترك في جبل توتيل
صور للذكري منحوتات
ونرحل من قضارف الخير
ونرفع للنصر رايات
وفود العودة من بارا
تغني عليها حكامات
وطبل العز يدق فى ام در
وترقص بحري في شمبات
ونعرف حكمة النيلين
وكت اتلاقو منسجمات
وشوق الأزرق الدفاق
وسر جريانو في الفلوات
وقدلة ابيض النيلين
شموخ ومهابة وعز وثبات
نكبر نحن فرحانين
نغالب نحبس الدمعات
ونتقالد نبل الشوق
بدون ما تطلع الكلمات
ونفتح نحن باب البيت
نقيف قدامو كم ساعات
ونتعرف علي الشارع
ونتغالط ولاد وبنات
لا لا دا ماهو باب بيتتا
دا ياهو عاينو للبوهيات
طيب وين شجرتنا
وين النيمة والنخلات
والليمونة والجوافة
وينو دربنا ياخ وين فات
يمه و يابا بالعبرات
يقولوا ادخلو
خلو الفات
ويقروا أية الكرسي
وسورة الناس وكم ايات
ينبهو فينا براحة
و اوع تحركوا الحاجات
وما تندهشوا يا اولاد
ح تلقوا الكدسة متكيات
لا ثلاجة لا دولاب
لا بتجاز ولا شاشات
ما راح تلقوا عربيتنا
مافي اسرة لا لعبات
بتلقوا الريحة ما ريحتنا
البسو ليكم كمامات
وناخد بكية بكية شوق
ونبقي نكفكف الدمعات
نشوف البيت ونتصبر
و لازم نكتم الاهات
عشان الأجر ما ينقص
عشان تتنزل الرحمات
ونمشي علي المثاني هناك
وتبقي اللمة و الضحكات
ونضرب نحن أجراسنا
وفي الطابور تكون وقفات
امين يا رب العالمين
ثقتنا في ربنا لا حدود لها وإن شاء الله يتحقق مراد كل زول وترجع بلدنا زي اول واحسن كمان .
