شاعر أغنية (يا مواسم) يعاتب الدكتور والبندول
في منشور له بعنوان (يا مواسم … ليه؟؟!!) عاتب الشاعر الفخيم بشرى سليمان المطربين حسين الصادق . واحمد فتح الله (البندول) عتاب محترم وفي قمة الذوق .لأنهما تغنيا باغنيته الشهيرة(يا مواسم) التي قدمها لاول مرة الفنان الراحل احمد ربشة ثم تغني بها عدد من المطربين ولم يستأذنا منه بالتغني باغنيته المعروفة ..
بشرى سليمان كتب في منشوره على صفحته الرسمية بموقع الفيس بوك مالي:(صحيح أنا بشرى سليمان مقل فى كتاباتى الشعرية فى مجال الأغنية السودانية، بس دا ما معناتو إنى اختفيت عن الدنيا او مُتّ .. انا حىّ يرزق ولازالت اكتب، وعندى إشعار موجودة وقاعدة حبيسة الإدراج لمن يرغب، وتأكيدا لذلك فى ناس جميلين غنو لى .
دا ما بيعنى انى ما متصالح مع الفنانين الشباب، لكن بعتقد إنو يكون فى نوع من الاحترام والتقدير وانت بتتناول عمل لىّ وتقدمو للمستمع .. انا صاحب العمل وبموجب قوانين الملكية الفكرية أنا صاحب الحق الاصيل فى كلمات اُغنية (يامواسم) التى قدمها اول من قدمها الفنان الراحل أحمد ربشه .. وبعدها تناولها عدد كبير من الفنانين، وكلهم طلبو منى أن اسمح لهم بالتغنى بها اخرهم عامر الجوهرى وابوبكر سيداحمد ..
عدا اثنين اكتشفت أنهم عاملين تسجيلات من ورايا .. وهما : احمد فتح الله البندول و حسين الصادق .. ما قادر أفهم بالظبط وجهة نظرهم شنو فى عدم اهتمامهم باخذ الأذن، هل فى صعوبة مثلا أنهم ما يعرفو عنوانى، وانا موجود فى الفيسبوك والواتس وصديق لأغلب شعراء الأغنية السودانية وكثير من الفنانين الكبار؟ أم هو نوع من الغرور الذى يصيب هؤلاء الشباب فى أنهم أكبر من أن يتصلو بحتة شاعر مافى زول عارفو، وانهم حيشهِّرو ليهو الأغنية بتاعتو؟ طيب ما الأغنية دى كان ما عجبتك، وشعرت بأنها مرغوبة، وعليها طلب ومحبة لدى الناس ما كنت غنيتها..
حقو الناس تجي بالدرب العديل ومافي بيناتنا لا حواجز لاموانع .. وبى بساطة شديدة تقول: لو سمحت عاوز أغنى الأغنية دى .. ودى الاصول البتخليك إنسان وفنان وعندك قيمة عند الناس.))
