هل صحيح أن بنك الخرطوم يخصم دون علم العميل!!

لواء دكتور إسماعيل ابوشوك:هل صحيح أن بنك الخرطوم يخصم دون علم العميل!!

السيد محافظ بنك السودان المركزي (CBOS)،

اسمع شكاوى الناس في براحات التلاقي اليومية، واقرأ عديد البوستات في قروبات السودانيين من مختلف الوان الطيف.

واكاد لا أصدق !!!!!

هل صحيح ان بنك الخرطوم يخصم دون علم العميل، ودون وجه حق من حسابات العملاء مبالغ. وهل يتم ذلك بعلم البنك المركزي؟؟

هل يعتبر البنك المركزي ما يدور في الميديا هي شكوى رسمية، وتستوجب تدخل رقابته؟

دعني انقل لك ما قرأته صباح اليوم في قروب مخدوم ومراقب بحق،،،

(كلام عجيب يا إدارة بنك الخرطوم، شهر يناير خصمتو خمسة الف، قلنا خييير.

قبل ايام خصمتو ١١ الف بدون ما تظهروها في كشف الحساب، ودا في ذات نفسو يبقي شنوووو؟؟؟؟!!!!!!!!!!

داسنها ليه؟؟؟؟

مامقتنعين؟؟؟؟؟ ومامقنعين !!!!!!!

أي حركة لابد تظهر في كشف الحساب وييييييييين هيئة الرقابة علي المصارف؟؟؟؟؟

اوقفتو كشف الحساب لسبعه ايام ولشهر

ودا ما بحلكم.

الناس ضايقة وماعندها التكتح وحريصة على حقها ومتابعة حسابها بعد كل معاملة،، يعني مافي زول بيدقس

الان مافاهمين حاجة !!!!!!

زمان كان بتخصمو من الرصيد حتي لو كانت استرجاع تحويلات بالخطأ ( يعني حق)

اسي بقيتو من شدة الجشع والافتراء بتخصمو حتى لو الزول ماعندو رصيد وتقلبو حسابو بالسالب.

الله أكبر عليكم.

اوكاش بس).

عبارة وييييييبن هيئة الرقابة ، هي شكوى لبنك السودان،

وعبارة الله اكبر عليكم هي قمة الشعور بالظلم وإن كان هناك ظلم وقع فهي دعوى ليس بينها وبين الله حجاب.

وعبارة أوكاش بس، هو نداء للناس لعدم التعامل مع البنك والانصراف لبنك أمدرمان الوطني.

بل هناك اتهامات أخرى اوردها لكم هنا…

((بنك الخرطوم جغم من اي زول 5 الف

وعدد مستخدمي تطبيق بنكك 9 مليون

يعني في لحظة جغم 45 تريليون.. هذه الاموال بتمشي الامارات لشراء سلاح للمرتزقة.

ادارة بنك الخرطوم موجودة في الامارات

الناس تسحب قروش من تطبيق بنكك، لان الآن اتسحبت مبالغ ضخمة بالمليارات من المواطنين))…

(( 45 تريليون تقريبا  بتساوي 18 مليون دولار))…

من الخيرين اعلاه

هل هذه الأرقام صحيحة؟ ، وهل فعلا البنك يعمل في الخفاء؟

المطلوب من بنك السودان مراجعة بنك الخرطوم فورا ، وارجاع الحقوق لأهلها إن وجدت، وتمليك الرأي العام بالحقائق .

نعلم وتعلمون ان لحرب الكرامة أوجه عديدة ،، ربما تكون هذه إحداها، فإن كانت من بنك الخرطوم فأنتم له بالمرصاد،، وإن كانت من آخرين ضد بنك الخرطوم لخلق بلبلة!!! فتمليك الرأي العام يكون أكثر الحاحا من الأولى.

الله المستعان