كيف تحسب معدل ضربات قلبك في البيت؟

كيف تحسب معدل ضربات قلبك في البيت؟

النبض هو عدد المرات اللي قلبك بنبض فيها خلال الدقيقة، وده بيعبر عن سرعة ضخ الدم في جسمك.

أهميته كبيرة شديد، لأنه ممكن يكشف ليك عن مشاكل في القلب أو الدورة الدموية قبل ما تحصل مضاعفات.

النبض الطبيعي بيعني إنو القلب شغال تمام، ولو سريع ولا بطيء شديد بدون سبب، ممكن يكون في مشكلة بتحتاج مقابلة الدكتور .

طيب كيف تحسب نبضك؟

لو داير تعرف نبض قلبك وانت قاعد في البيت، الموضوع بسيط وما داير معدات معقدة ، وكل اللي عليك تعملو الخطوات دي:

أول_حاجة ارتاح دقيقتين عشان نبضك يكون طبيعي، بعد داك جيب أصابعينك (السبابة والوسطى) وختهم على الجهة الداخلية لمعصمك تحت الإبهام، أو جنب رقبتك تحت الفك مباشرة ، حتحس بنبض بسيط، لو ما لقيتو جرب تحرك صباعينك شوية لحدي ما تلقاهو.

بعد ما تحس بالنبض، جيب ساعة فيها عداد ثواني أو استخدم مؤقت تلفونك، وعدد النبضات لمدة 15 ثانية، بعد داك اضرب الرقم في 4… مثلا لو عدّيت 20 نبضة في 15 ثانية، معناتو معدل نبضك 80 نبضة في الدقيقة.

يعني ضربت ال 20×4

طيب ممكن واحد يقول لي ال4 اللي بضرب فيها الرقم الجاني هي شنو؟

طيب ياعزيزي، المفروض النبض نحسبو في دقيقة كاملة، وهنا حسبناه في 15ثانية المفروض نضربو في 4 علشان يبقى كأنو حسبناه في دقيقة.. وممكن تحسبو في 30ثانية وتضربو × 2 .

المعدل الطبيعي للنبض للبالغين بيكون بين 60 – 100 نبضة في الدقيقة

تنبيه:

لو حسيت إنو نبضك سريع شديد وانت مرتاح، أو بطيء وما طبيعي، أو متقطع، الأحسن تمشي تقابل الدكتور تتأكد من

الموضوع.