من هو صاحب المقولة الشهيرة “صفا انتباه أرضا ظرف”!
القصة المعروفة التي تحكي أن ضابطا سودانيا كان يشارك في حرب بدولة الكويت ، بل كان قائد للفرقة المشاركة ، وعند ما تمت المهمة بسلام ونجاح كبير ، أرادت الحكومة الكويتية أن تكافأهم ، وهم على مدخل الطائرة التي ستقلهم إلى السودان وزعوا لهم ظروف تحتوي على مبالغ مالية.
وقبل ان يتحركوا نحو الطائرة ، قال القائد وهو يخاطبهم صفا انتباه أرضا ظرف خلف دور معتدل مارش وتوجهوا إلى الطائرة تاركين الظروف على الأرض ، ولسان حالهم يقول” اننا جيش لا نشترى ولسنا مرتزقة”.
اطلعوا على هذه القصة ستعرفون من ذاك الضابط وكيف كان سلوكه.
قالت احدى الطالبات : زمان و انا في سنة تانية ابتدائي( 7 سنوات) ، اتشاكلت مع زميلتي في الفصل
(مع اني كنت خوافة شديد و ما بتشاكل) ، بس سبحان الله اليوم داك صوتي طلع كيف ما عارفة و بصراحة البت استفزتني شديد ،
و اتشاكلنا ، وقتها ابوي كان قائد سلاح المدرعات في الدمازين
و البت ابوها كان عسكري في نفس السلاح، المهم و انا بتشاكل معاها.. قلت ليها :
استني بس لو ما خليت ابوي يرفد ابوك و البت سكتت مني
لحظتها حسيت بالانتصار.
(و يمكن تكون اول مرة انتصر في شكلة)، خصوصا لمن جاني السواق بي عريبتنا (بتاعت الجيش) و ركبته قدام بكل فخر .
رجعت البيت و انا فرحانة و مبسوطة و اشعر بالفخر واول ما جاء ابوي من الشغل، بعد الغداء كان بقعد معانا بنحكي ليه بالحصل في اليوم و نتونس .
قمت حكيت ليه بالحصل بالتفصيل و انا بضحك و الكلام القلته لي زميلتي و احساسي بالانتصار ،فجاة ابوي ملامح وشه اتغيرت و فجاة قال لي : امشي البسي سريع نحن طالعين ،قالها بي زعل شديد .
امي بقت تسال ماشين وين :
ما رد عليها قال ليها :
لمن نرجع و طلعنا .
ما فاهمة نحن ماشين وين و ابوي زعلان مني و ما بتكلم معاي المهم ابوي اخيرا، اتكلم وسالني : اتشاكلتوا ليه ؟!!
قلت ليه : جرت شنطتي و قالت لي شنطتك السمحة دي و قطعتها لي بالجرة دي .
و في اول محل بتاع شنط قابلنا و قفنا فيه و نزل اشترى شنطة حلوة شديد احلى من شنطتي القديمة ، طبعا فرحت افتكرتها لي انا و بقينا ماشين و ماشين ،لمن طلعنا برة الدمازين ،بصراحة شفقت.
قلت ليه: يا ابوي نحن ماشين وييين؟!!! قال لي :
ماشين عند ناس عمك جاد الرب (والد زميلتي) .
قلت : لي شنو يا ابوي ..؟!
وقتها قال لي كلام عمري ما حنساهو… (اسمعي كلامي دا كويس و ختيه حلقة في اضانك .. اياك يا اريج تفتري على خلق الله خصووصا لو كان اضعف منك او انت حسيت نفسك اقوى منهم.
ديل عبيد الله ما عبيدنا نحن فااااهمة ، زينا زيهم و يمكن هم عند ربنا احسن مننا . ربنا خلقنا كلنا زي بعض ووزع لينا ارزاقنا بالتساوي .لا هي احسن منك و لا انت احسن منها . تقولي ليها ابوي يرفد ابوك.؟!!! . هو الجيش بتاع ابوك انت.. الجيش دا للشعب والوطن.
الشعب اللي هم جزء منه يعني لو عايزين الجيش و الحكومة يمشوا .. بيمشوا لانه حقهم هم و خدمتهم هم.الكبير في خدمة الصغير .القااائد في خدمة العسكري ، و العسكري في خدمة المدني و هكذا
فهمتي كلامي دا بتي
ما عايز اكرر الكلام دا تاني فاااهمة هسع حنمشي بيتهم و تديها الشنطة دي هدية و تعتذري منها قدام اهلها و تعتذري لابوها و بكرة حاجي المدرسة عشان تعتذري منها قدام الفصل و عقابا ليك تاني حترجعي من المدرسة برجلينك او بعربية النقل بتاعت المدارس.
لحد ما تحرمي تفتري على خلق الله و فعلا وصلنا بيتهم و استقبلنا بفرح و اول حاجة قالها ابوي لابوها :
اعفي لي يا عمي جاد و باسه في راسه و خلاني انا زاتي ابوس في يده و راسه بصراحة وقتها الراجل لمن بكى .
و قال لابوي : و الله سعادتك الموضوع ما بستاهل ديل شفع
رد ابوي و قال ليه :
بكرة الشفع بكبروا و لازم يتعلموا . وانا اعتذرت لزميلتي قدام امها و اخوتها و اديتها الشنطة (العاجباني) هدية .
وفعلا تاني يوم من الصباح ابوي مشى معاي المدرسة و في الفصل (الحصة الاولى) وقف و معاه الاستاذة و طلعوني قدام الفصل كلهم و اعتذرت ليها .
و بعدها ابوي مشى .
و نهاية الحصة الاستاذة وقفتنا الاتنين و قعدتنا جنب بعض والموضوع بقى عادي.و من يومها بقينا صاحبات.
وقتها عرفت يعني شنو قيمة الانسان اللي كرمه ربنا ما اهينه انا .. التواضع شيمة الشرفاء و الانسانية قبله
كدا ابوي ربانا وعلمنا وفهمنا بالجد..فخورة انك أبوي.
ربنا يرحمك و يحسن اليك و يجعل مثواك الجنة يا رب العالمين .
سعادة. اركان حرب صديق الزيبق صاحب الموقف والعبارة الشهيرة:
صفا ااااااانتبه … ارضااااااا. ظرف خاااااالف در. معتدااااال. مارش وتركوا. المبالغ المالية من الكويت في الارض !
مثبتا. اننا جيش لا نشترى ولسنا مرتزقة. ..
