تفاصيل أذكى عملية سرقة واحتيال تتم على صايغ ذهب
قال أحمد عثمان إبراهيم ” كنت معزوم فى مناسبه زواج غداء وفى الصفرة كان قاعد معانا ولد شاب وحقيقة انا ما كنت بعرفه وشايف الناس بتكفر ليه وعرفت فيما بعد انه هو صايغ بتاع دهب وزول محترم وخلوق جداً وعنده محلات دهب فى سوق كسلا واتنصب عليه، المهم الشاب ده بداء يحكى فى قصته العجيبه.
وقال انا اتنصب على فى مبلغ 2 مليون جنيه” بطريقة عجيبه ولا عرفت ابكى على نفسى ولا عرفت اضحك، رغم انى زول حريص جداً وحذر فى تعاملاتى وزول ود سوق ، وقال انا فتحت دكانى من الصباح وقلت فتاح يا عليم رزاق ياكريم وجاتنى وحده منقبه وقالت لى نزل لى القويشة ديك وجيب لى الخاتم داك … ودى الدقه بتاعتها ما سمحه ودى ماعجبتنى ودى حلوه…
امور النسوان بتاعت اختيار وشراء الدهب البنعرفه كلنا ديك ،وفى الاخر عزلت ليها كم قويشة وسلسل وخاتم وقالت لى لحظه احول ليك المبلغ بنكك وطلعت تلفونه واخدت مسافه كده وقالت لى تطبيق بنكك معلق معاى وماراضى يفتح وقالت لى كدى شوف بنكك بتاعك انت شغال ولا انا براى شبكتى دى البراها معلقه.
وانا طلعت تلفونى بحسن نيه وفتحت تطبيق بنكك ولقيته شغال ووريته ليها من بعيد انه فاتح وشغال وقالت لى كدى طيب ادينى تلفونك ده ثوانى اتصل عليه لزوجى لانه شبكت تلفونى دى طاشه واديته التلفون بكل ثقه وفى اللحظه دى دخلت على وحدة تانيه منقبه زيها وبدأت تسال فينى الجرام بكم وكدى نزل لى ده وجيب لى داك…
وصاحبتنا ديك فى المسافة دى رفعت الستارة بتاعت تلفونى من تحت بسرعة ودخلت على تطبيق بنكك لانه كان مفتوح ونشط وحولت من تلفونى 2 مليون جنيه، وصورت الاشعار بتلفونه وده كله تم فى دقائق وانا كنت مشغول مع الزبونه التانية وبعدها طلعت نهائى من التطبيق ورجعت لى تلفونى وشكرتنى وقالت لى زوجى مابرد خلى لى الحاجات العزلتها دى على جنب وحلفتنى انى ما اتصرف فيها أو ابيعة وانها ح تمشى تجيب كاش من زوجها وتجينى راجعة.
ومشت اتخارجت وبعدها بمسافة قمت فتحت حسابى وراجعته ولقيته ناقص واكتشفت انه طلعت منه حواله صادرة بمبلغ 2مليون جنيه لرقم حساب تانى ومشيت النيابه وفتحت بلاغ ولقيت رقم الحساب الاتحول ليه المبلغ ده بتاع واحد صايغ بتاع دهب فى نفس السوق ولمن وريناه الحاصل قال لى دى وحدة جاتنى هنا الصباح واختارت ليها دهب وقالت لى بعد ساعة ح تصلك حواله من زوجى وجات ورتنى الاشعار بتاعة واستلمت دهبه وفاتت
وحتى المبلغ الوصلنى طلع زيادة وقالت لى زوجى غلط فى التحويل وطلبت منى ارجع ليها الزياده دى كاش ورجعتها ليها كاش وشالته ومشت ولم راجعنا الكامرات لقينها نفس البت وماظاهر فى وشها شى غير عيونه لانها منقبه،
باختصار البت طلعت ذكيه جداً وضربت عصفورين بحجر واحد وتم فتح بلاغ ضدها وبعد يومين تم القبض عليها وهى تعرض الذهب لصايغ اخر بغرض البيع وبعد التحقيق اعترفت بجريمتها وتم احالتها للنيابه، وتم استرداد المبلغ المحول للصايغ.
“ولا يظلم ربك احدا”
المال الحلال يعود الى صاحبه، لا بيضيع ولا بيتسرق المال الجاي بتعب وعرق ومجهود وبالحلال عمره ما يضيع ابداً “
